Media greke: Rama tërhiqet, njeh për herë të parë fitoren e Fredi Belerit në Himarë
Kryeministri Rama pranon për herë të parë që Fredi Beleri është zgjedhur kryetar i Bashkisë së Himarës, shkroi dje gazeta greke “Kathimerini“.
Në një lëvizje të enjten që, në rrethana të caktuara, mund të hapë derën e një kompromisi në rastin e grekut etnik të burgosur Fredi Beleri, kryeministri shqiptar Edi Rama e quajti atë si “kryetar i zgjedhur i Bashkisë së Himarës” për herë të parë, edhe pse ai mbështeti si të drejtë vendimin e Gjykatës Speciale Kundër Korrupsionit dhe Krimit të Organizuar në Tiranë që i mohoi lejen për të marrë pjesë në një betim.
Beleri ka qenë i burgosur në pritje të gjyqit që nga maji për akuzat për blerje votash pas arrestimit të tij në prag të zgjedhjeve bashkiake të cilat ai fitoi kundër kandidatit socialist Jorgo Goro.
Çështja ka acaruar marrëdhëniet me Greqinë, e cila thotë se të drejtat e njeriut të Belerit po shkelen dhe situata ka çuar në një bllokim të procesit të anëtarësimit të Shqipërisë në BE, me Athinën që kërcënon me veto nëse kryebashkiaku i Himarës nuk lejohet të marrë detyrën.
Rama iu referua arsyetimit të vendimit të Gjykatës Speciale të publikuar të enjten, i cili e cilëson si “ngërç” situatën e krijuar për shkak të “vazhdimit të përkohshëm të detyrës së kryetarit” nga kandidati i mundur Goro.
Zyrtarë të Ministrisë së Jashtme greke theksuan se pranimi i arsyetimit të vendimit nga kryeministri shqiptar është një hap i rëndësishëm në procesin e kalimit të pushtetit në Bashkinë e Himarës deri në përfundimin e proceseve gjyqësore në pritje. Athina vuri në dukje se hapi i Ramës është pozitiv, por respektimi i shtetit ligjor është një kusht themelor për anëtarësimin e Shqipërisë, prandaj janë vendosur tre kushte: betimi i Belerit, gjykimi i tij i drejtë dhe prezumimi i pafajësisë.
Rasti ka shkaktuar fërkime edhe në marrëdhëniet greko-gjermane, pasi Berlini vlerëson se rasti i zgjedhjes së kryetarit nuk mund të rrezikojë perspektivën europiane të Ballkanit Perëndimor.
Sipas burimeve pranë kryeministrit shqiptar, referimi i Belerit si “kryetar i zgjedhur i bashkisë” nuk do të thotë se do të zhvillohen zgjedhje të reja, pasi ai njihet si i tillë deri në përfundimin e gjyqit.
Qeveria shqiptare thuhet se e ka interpretuar vendimin si një arsyetim ligjor që i jep të drejtën për të vendosur një kryebashkiak të përkohshëm, pasi tashmë pritet që Goro të japë dorëheqjen për të lehtësuar situatën.
Pritet që kryetari i përkohshëm të jetë pjesëtar i komunitetit etnik grek dhe vendimi do të merret para Vitit të Ri.
Dje, Kryeministri Edi Rama sqaroi arsyet se fakti që nuk i jepet Belerit nga Drejtoria e Përgjithshme e Burgjeve, që sipas tij është qëndrim korrekt ligjor.
“Nga leximi i vendimit të arsyetuar të GJKKO mbi mosdhënien e lejes për betimin e kryebashkiakut të zgjedhur të Himarës, shoh të udhës të nënvizoj publikisht sa më poshtë:
1. Mosdhënia e lejes për betim në kushtet e paraburgimit nga ana e Drejtorisë së Përgjithshme të Burgjeve, rezulton përfundimisht një qëndrim korrekt ligjor, ashtu sikundër edhe refuzimi i gjykatës speciale ndaj kërkesës është qartësisht i lexueshëm dhe lehtësisht i kuptueshëm.
2. Fakti që kryetari i zgjedhur i Himarës mbetet i tillë deri në fund të gjykimit dhe vetëm shpallja me vendim të formës së prerë do të përcaktojë mundësinë e tij për t’u betuar në rast pafajësie apo pamundësinë e tij për të mbetur kryebashkiak në rast fajësie, është po ashtu qartësisht i lexueshëm dhe lehtësisht i kuptueshëm.
3. Referimi nga ana e GJKKO e ngërçit që krijohet në vazhdimësinë e përkohshme të detyrës nga ana e kandidatit humbës, përderisa faktikisht kryebashkiaku i zgjedhur mbetet në paraburgim, ndërkohë që kryebashkiaku ende në zyrë nuk e ka legjitimitetin për të drejtuar bashkinë në mungesë të fituesit, e bën qartësisht të lexueshme dhe lehtësisht të kuptueshme nevojën e daljes nga ky ngërç përmes ndërprerjes së vazhdimësisë së qëndrimit në detyrë të kandidatit humbës, bazuar në praktikat më të mira europiane për sigurimin e shërbimeve publike në bashkinë e Himarës.
Si përfundim, ky vendim i arsyetuar i GJKKO është një konfirmim i padiskutueshëm ligjor i “çështjes Beleri” si një çështje e drejtësisë, assesi e politikës apo kurrsesi e organeve të qeverisë qendrore. Po ashtu arsyetimi i këtij vendimi krijon një premisë pozitive për adresimin e ngërçit të lartpërmendur.”, shkroi Rama.
